កាលពីល្ងាចថ្ងៃទី២៩ វិច្ឆិកា កន្លងទៅក្រុមមេដឹកនាំអាវក្រហមមកពី៨ខេត្ត នៅភាគខាងជើងប្រទេសថៃគឺខេត្តឈៀងម៉ៃ ឡាំងប៉ាង ឡាំពូន ព្រែណាន ឈៀងរ៉ាយ ផាយ៉ៅ និងម៉ែហុងសន បានប្រមូលផ្គុំគ្នានៅបរិវេណទីលាន “អនុស្សាវរីយស្ដេច៣’នៅកណ្ដាលក្រុងឈៀងម៉ៃ សំរាប់ធ្វើការសច្ចាបង្កើតជាក្រុមតស៊ូទាមទារប្រជាធិបតេយ្យឲ្យមាននិន្នាការតែមួយ ។ ក្រុមតស៊ូទាមទារប្រជាធិបតេយ្យខាងលើ មានឈ្មោះថា”សភាក្រហម’ ឬ “សមាគមក្រហម”ដោយមានលោកសារុត ប្រាជ្ញវីរគុល ជាប្រធានសភានិងចាត់ទុកឈៀងម៉ៃ ជារាជធានី ក្នុងដំណើរការនិន្នាការតស៊ូដោយមានលោកសាងួន វង្សមុនី សមាជិកសភា ក្នុងខេត្តឡាំពូន និងលោកថាណេស ចារើន មឿង អ្នកវិទ្យាសាស្ត្រនៃមហាវិទ្យាល័យ ឈៀងម៉ៃ ធ្វើដំណើរមកចូលរួមធ្វើជាសាក្សី ក្នុងការប្រមូលផ្គុំគ្នានេះដែរ ។
មេ ដឹកនាំក្រុមអាវក្រហមទាំងអស់មានចំនួនជាង៥០នាក់ មកពី៨ខេត្តនៅភាគខាងជើង បានចាប់ដៃរួមគ្នាប្រកាសពីគោលជំហរ នៅខាងមុខទីលាន “អនុស្សាវរីយស្ដេច៣” ថា ក្រុមអាវក្រហមនៅភាគខាងជើងនឹងសហការគ្នាឲ្យបានរឹងមាំក្លាយជាផ្លុងមួយ ដើម្បីតស៊ូនឹងក្រុម “អាមាត្យ” ឬក្រុមអ្នកអែបអប និងជាការបង្ហាញនូវគោលជំហរថា ក្រុមអាវក្រហមនៅភាគខាងជើងមិនបានបែកបាក់គ្នាទេ ហើយសហការគ្នាជាក្រុមដែលមាន៨ខេត្ត។ សំរាប់ការតស៊ូលើកនេះ គឺមានគោលដៅយ៉ាងច្បាស់លាស់មួយក្នុងការផ្ដួលរំលំក្រុមអាមាត្យ ឬអ្នកអែបអប ឲ្យស្ថិតក្នុងគោលដៅប្រជាធិបតេយ្យតែមួយ។
លោកសារុត ប្រាជ្ញវីរគុល ប្រធានសភាក្រហម នៅភាគខាងជើង បានបង្ហើបឲ្យដឹងថា គោលជំហររបស់ក្រុមអាវក្រហមដែលបង្កើតនេះ ពីព្រោះប្រទេសថៃក្នុងពេលបច្ចុប្បន្ននៅខ្វះភាពយុត្តិធម៌ ការគ្រប់គ្រងមិនទាន់មានភាពប្រជាធិបតេយ្យពិតប្រាកដនៅឡើយ ដោយស្ថិតនៅក្រោមការគាបសង្កត់ ពីពួកអាមាត្យ ដែលរង់ចាំបង្គាប់បញ្ជានៅគ្រប់ពេល។ ដូច្នេះ៨ខេត្តនៅភាគខាងជើង បានរួបរួមគ្នាធ្វើការតស៊ូដោយមានការសច្ចាជាសាកលថា ជាការតស៊ូពុះពារគ្រប់ឧបសគ្គរបស់សភាក្រហម ក្រោយពាក្យស្លោកថា “យើងនឹងមិនបោះបង់ចោលគ្នាទេ” ។
ហោរា៣នាក់ទាយពីថាក់ស៊ីន
កាសែតមួយរបស់ថៃឈ្មោះ “ឃុមឆាត់ លឹក” កាលពីថ្ងៃ៣០ វិច្ឆិកា បានលើកយកការទស្សន៍ទាយជោគជាតារាសីរបស់អតីតមេដឹកនាំថៃ (ថាក់ស៊ីន) ថា នឹងមានភាពថ្កុំថ្កើងនៅក្រោយថ្ងៃទី២៦ មេសា ខាងមុខ រួមទាំងបញ្ជាក់ថា ក្នុងអំឡុងខែមករា-មីនា ឆ្នាំ២០១០ នឹងកើតមានការផ្លាស់ប្ដូរដ៍ធំធេង។ស្របពេលជាមួយគ្នានេះទីភ្នាក់ងារ INN បានលើកឡើងពីការយល់ឃើញរបស់ហោរាសាស្ត្រចិនសែដ៏ល្បីម្នាក់ គឺលោក ផានូវ៉ាត ផាន់រីឆាតគុល ដែលធ្លាប់ទស្សន៍ទាយជោគជាតារាសីលោកថាក់ស៊ីន ស៊ីណាវ៉ាត្រាតាំងពីឆ្នាំ២០០៣ថា ជាមនុស្សដំបូងដែលនឹងគ្នាផែនដីរស់នៅ ពោលគឺមិនយល់ស្របតាមការទស្សន៍ទាយដែលថា អតីតនាយករដ្ឋមន្ត្រីថៃ លោកថាក់ស៊ីន ស៊ីណាវ៉ាត្រា នឹងមិនវិល មកភាពល្បីល្បាញវិញទេក្រោយថ្ងៃទី២៦ មេសា ២០១០។
ហោរាចិនសែខាងលើបានធ្វើការវិភាគលើ “ង៉ូវហេង” (ការមានសំណាង) ជាលើកចុងក្រោយ បន្ទាប់ពីបានឃើញមុខមាត់តាមបណ្ដាលផ្សព្វផ្សាយនានាថា បច្ចុប្បន្នង៉ូវហេង របស់លោកថាក់ស៊ីនមិនល្អ មុខមាត់ស្រងូតស្រងាត់ ធ្វើអ្វីៗដែលអ្នកផ្សេងមិនធ្វើ មានលក្ខណៈ ដូចលោកសាម៉ាក់ ស៊ុនដារ៉ាវ៉េត ក្នុងខណៈដែលលោកជានាយករដ្ឋមន្ត្រី ។ ហោរា ដដែលនេះបានឲ្យដឹងថា ខ្លួនធ្លាប់ដាស់តឿនលោកសាម៉ាក់ ថាត្រូវលាលែងពីតំណែង និងត្រូវទៅថែទាំសុខភាព ប៉ុន្តែលោកមិនជឿ។ចំពោះលោកថាក់ស៊ីនវិញ បើតាមគោលការណ៍ចម្បងង៉ូវហេង គឺបុរសដែលមានមុខមាត់ហើម នឹងមានបញ្ហាសុខភាព ប៉ុន្តែនារីជើងហើមក៏មានបញ្ហាសុខភាពដែរ។
ចំណែកលោក កេងកាច ជុងចៃប្រា ជាគ្រូទាយដ៏ល្បីឈ្មោះម្នាក់ បានផ្ដល់ការយល់ឃើញថា បច្ចុប្បន្នជោគវាសនារបស់លោកថាក់ស៊ីនមិនល្អ ចាប តាំងពីខែវិច្ឆិកា រហូតមក ដូច្នេះនឹងគ្នាវិលទៅរកភាពអស្ចារ្យវិញឡើយ។ ដោយឡែក នៅផ្ទះរបស់លោកថាក់ស៊ីន មានលេខមិនល្អ ស្ថិតក្នុងផ្ទះលេខ៤៧២ក្នុងពេលយកមកបូករួមគ្នាគឺមាន ១៣ ដែលជាលេខដែលគ្មានសិរីសួស្ដី ដោយហោរាសាស្ត្របញ្ជាក់ថា លេខ១៣នេះ បើសិនជាជោគជតាងើបឡើងក៏ខ្ពស់ ហើយបើធ្លាក់ចុះក៏ខ្លាំង ខណៈដែលព្រះយេស៊ូសោយទិវង្គតក៏លេខនេះដូចគ្នា។
រីឯលោកភីនយ៉ូ ភុងចារើន នាយកសមាគមហោរាសាស្ត្រជាតិថៃ ផ្ដល់ការយល់ឃើញថា បច្ចុប្បន្នផ្កាយព្រះព្រហស្បតិ៍ បានរំកិលទៅរកជោគជតារាសីលោកថាក់ស៊ីន ពេលនេះរាសីមិនល្អ និងកើតមានហេតុការណ៍ធ្ងន់ធ្ងរ និងគ្មានដែនដីរស់នៅ ហើយក៏បាត់បង់ទ្រព្យសម្បត្តិ។
ស្របពេលជាមួយគ្នានេះ លោកភីនយ៉ូ ភុងចារើន ក៏បានធ្វើការទស្សន៍ទាយជោគ ជតារាសីរបស់លោកអាប់ភីស៊ីត វេចាជីវ៉ា នាយករដ្ឋមន្ត្រីថៃថា ត្រូវប្រយ័ត្នគ្រោះថ្នាក់ ពីព្រោះផ្កាយព្រហស្បតិ៍របស់លោករំកិលចូលភពមរណៈ ដូច្នេះខ្លួនស្នើសុំឲ្យនាយករដ្ឋមន្ត្រីប្រយ័ត្នប្រយែង ជាពិសេសក្នុងខែកុម្ភៈ -មីនា ដោយណែនាំថា លោកមិនគួរធ្វើដំណើរទៅទិសខាងកើត ឬខាងកើតឆៀងខាងត្បូង ដែលអាចនិងកើតហេតុដ៏អាក្រក់ភ្លាមៗបាន។
អាប់ភីស៊ីត ធ្លាក់ពិន្ទុខាងសេដ្ឋកិច្ច
អាប់ភីស៊ីត វ៉េចាជីវ៉ា នាយករដ្ឋមន្ត្រីថៃ មានភាពទន់ខ្សោយណាស់នៅក្នុងការដោះស្រាយបញ្ហាសេដ្ឋកិច្ចចាប់តាំងពីរូបលោកបានក្លាយជានាយករដ្ឋមន្ត្រីមក ដោយក្នុង១០ពិន្ទុ លោកទទួលបានត្រឹមតែ៥,៣ពិន្ទុប៉ុណ្ណោះ បើនិយាយការប្រលង គឺលោកជាប់យ៉ាងប្រផឹតប្រផើយ។ ទាក់ទិនទៅនឹងបញ្ហានេះក្រុមអ្នកជំនួញធំៗបានផ្ដល់ជូនលោកអាប់ភីស៊ីត ចំនួន៥,៣ពិន្ទុក្នុង ១០ពិន្ទុ ចំពោះវិធីដោះស្រាយបញ្ហាសេដ្ឋកិច្ចរបស់លោក។
លទ្ធផលខាងលើនេះគឺផ្អែកទៅលើសំណួរទាំងឡាយដែលសាកសួរដោយសមាជិកសភាពាណិជ្ជកម្មប្រចាំរបស់ថៃ ដែលរៀបចំធ្វើឡើងនៅខេត្តឈៀងមៃ រយៈពេល៣ថ្ងៃ និងបានបញ្ជាប់កាលពីថ្ងៃទី២៩ វិច្ឆិកា កន្លងមក ។ ក្នុងកិច្ចប្រជុំនោះអ្នកចូលរួមចំនួន៨៥ភាគរយ មកពីវិស័យឯកជន ចំណែក១៥ភាគរយទៀតមកពីស្ថាប័នរដ្ឋាភិបាល ។
លោក Thanavath Phonvichai នាយកមជ្ឈមណ្ឌលព្យាករណ៍សេដ្ឋកិច្ច និងអាជីវកម្ម នៃសាកលវិទ្យាល័យមួយដែលបានចូលរួម ក្នុងកិច្ចប្រជុំនោះដែរ បានថ្លែងថា លទ្ធផលនៃការប្រជុំបង្ហាញថា រដ្ឋាភិបាលក្រោមការដឹកនាំរបស់លោកនាយករដ្ឋមន្ត្រីអាប់ភីស៊ីត ជាប់ការតេស្តយ៉ាងប្រផឹតប្រផើយបំផុត។ មេដឹកនាំអាជីវកម្មមកពីតំបន់ភាគកណ្ដាល និងភាគ|សាន ប្រទេស ផ្ដល់ជូនលោកអាប់ភីស៊ីត ចំនួន៥,៦ពិន្ទុ អ្នកមកពីតំបន់ភាគខាងជើងផ្ដល់ជូនលោកអាប់ភីស៊ីត ចំនួន៥,២ពិន្ទុ និងអ្នកមកពីតំបន់ភាគខាងត្បូង ផ្ដល់ជូនលោកចំនួន៥,១ពិន្ទុ ។ ក្នុងនោះដែរ អ្នកដែលត្រូវយកធ្វើជាគោលដៅស្ទង់មតិក្នុងចំនួនដ៏ច្រើនលើសលប់បានបង្ហាញពីយោបល់របស់ខ្លួនថា ស្ថិរភាពនយោបាយជាកត្តាចម្បង ធ្វើអោយប៉ះពាល់ដល់វិស័យសេដ្ឋកិច្ច ដែលបន្តដោយការធ្លាក់ចុះនៃសេដ្ឋកិច្ចសាកលលោក និងការកើនឡើងនៃតម្លៃប្រេង និងវត្ថុធាតុដើម។
អ្នកចូលរួមក្នុងកិច្ចប្រជុំសភាពាណិជ្ជកម្មនោះមួយចំនួននិយាយថា ភាពចលាចល ផ្នែកនយោបាយ ជាបញ្ហាចំពោះមុខដែលរដ្ឋាភិបាលត្រូវដោះស្រាយជាបន្ទាន់ ចំណែកមួយចំនួនធំទៀតចង់ឲ្យរដ្ឋាភិបាល ដោះស្រាយ បញ្ហាពុករលួយជាបន្ទាន់។
អ្នកចូលរួមក្នុងកិច្ចប្រជុំសភាពាណិជ្ជកម្មថៃឆ្នាំ២០០៩ មួយចំនួនបានព្យាករណ៍ថា សេដ្ឋកិច្ចរបស់ថៃនឹងកើនឡើងពី២ទៅ៣ភាពរយ នៅឆ្នាំក្រោយនេះ គឺទាបជាងការព្យាករណ៍របស់រដ្ឋាភិបាល ដោយសារជំលោះ ផ្នែកនយោបាយ ការឡើងថ្លៃលុយបាតនិងវិបត្តិធនាគារនៅទីក្រុងឌូបៃ ប្រទេសអារ៉ាប់រួម។
លោក Dusit Nontananakom ប្រធានសភាពាណិជ្ជកម្មថៃ បានថ្លែងថា សភាពាណិជ្ជកម្មនឹងផ្ដល់អនុសាសន៍ទាក់ទងទៅនឹងយុទ្ធសាស្ត្រដោះស្រាយបញ្ហាសេដ្ឋកិច្ចនៅ សប្ដាហ៍ក្រោយនេះ។
(អត្ថបទដកស្រង់ពីwww.kohsantepheapdaily.com.kh)
