សកម្មភាពដកបង្គោលតម្រុយព្រំដែន ដែលនាំឲ្យមានការប្តឹងផ្តល់លោកសមរង្ស៊ី។ ករណីនេះ រដ្ឋសភា ក៏ស្វែងរកការពន្យល់ ពីរដ្ឋាភិបាលក្នុងដំណើរបោះបង្គោលកំណត់ព្រំដែនកម្ពុជា និង វៀតណាម។
រដ្ឋាភិបាលកម្ពុជា តាមរយៈលោកទេសរដ្ឋមន្ត្រី វ៉ា គឹមហុង ប្រធានគណៈកម្មាធិការជាតិ ទទួលបន្ទុកកិច្ចការព្រំដែន នឹងចូលឆ្លើយបំភ្លឺអង្គប្រជុំរដ្ឋសភា នាវេលាម៉ោង ៨ ព្រឹកថ្ងៃ ព្រហស្បតិ៍ ទី ២៤ ធ្នូ ឆ្នាំ២០០៩ ។ នេះបើយោងតាមសេចក្តីប្រកាសរបស់អគ្គលេខាធិការដ្ឋានរដ្ឋសភា ។
លោកទេសរដ្ឋមន្ត្រី វ៉ា គឹមហុង ប្រធានគណៈកម្មាធិការជាតិទទួលបន្ទុកកិច្ចការព្រំដែនរបស់រដ្ឋាភិបាល បានថ្លែងនៅព្រឹកថ្ងៃអង្គារនេះថា លោកបានត្រៀមខ្លួនរួចហើយ ដើម្បីឡើងឆ្លើយបំភ្លឺអង្គប្រជុំរដ្ឋសភា នាព្រឹកថ្ងៃព្រហស្បតិ៍ អំពីបញ្ហាបោះបង្គោលព្រំដែនកម្ពុជា និងវៀតណាម ដែលកំពុងមានការប្តឹងផ្តល់លើលោក សម រង្ស៊ី ។
លោកទេសរដ្ឋមន្ត្រី វ៉ា គឹមហុង ដែលធ្វើការបោះបង្គោលកំណត់ព្រំដែនរវាងកម្ពុជា និង ប្រទេសវៀតណាម ក៏ធ្លាប់បានបញ្ជាក់ថា ដំណើរការកំណត់ព្រំដែនប្រទេសទាំងពីរបានធ្វើឡើង តាមសន្ធិសញ្ញាព្រំដែនឆ្នាំ ១៩៨៥ និង សន្ធិសញ្ញាបំពេញបន្ថែមឆ្នាំ ២០០៥ ។ ក្នុងរឿងនេះ រដ្ឋាភិបាលកម្ពុជាបានធ្វើតាមច្បាប់ និង បែបបទបច្ចេកទេសសព្វបែបយ៉ាង ព្រោះការបោះបង្គោលកំណត់ព្រំដែននេះ ជារឿងប្រទេសជាតិ មិនមែនលេងសើចទេ ។
កាលពីថ្ងៃ២៦ វិច្ឆិកា សម្តេច ហេង សំរិន ប្រធានរដ្ឋសភា បានចុះហត្ថលេខាលើលិខិតរបស់លោកតំណាងរាស្ត្រ សុន ឆ័យ និង បានបញ្ជូនលិខិតនោះ ទៅកាន់សម្តេចនាយករដ្ឋមន្ត្រី ហ៊ុន សែន ដើម្បីពិនិត្យ ។ នោះគឺ ការស្នើសុំឯកសារ និង ការពន្យល់ដោយផ្ទាល់មាត់ពីរដ្ឋាភិបាលលើការបោះបង្គោលព្រំដែន ដែលបានធ្វើឡើងដោយលោក សុន ឆ័យ អ្នកតំណាងរាស្ត្រមណ្ឌលភ្នំពេញ និង ជាប្រធានក្រុមតំណាងរាស្ត្រគណបក្សសមរង្ស៊ី ។
ការស្នើសុំការពន្យល់ពីកិច្ចការបោះបង្គោលព្រំដែនរវាងកម្ពុជា និងប្រទេសវៀតណាម ត្រូវបានលោក សុន ឆ័យ ធ្វើឡើងដោយយោងលើការតវ៉ារបស់ប្រជាកសិករខ្មែរ នៅស្រុកចន្ទ្រា ខេត្តស្វាយរៀង លើកឡើងពីការបាត់បង់ដីស្រែរបស់ពួកគាត់ និង នៅតំបន់ព្រំដែនដទៃទៀត ។
ក្នុងសំណើនោះ លោក សុន ឆ័យ បានលើកឡើងថា ថ្មីៗនេះមានការលើកឡើង និង តវ៉ាជាញឹកញាប់ពីសំណាក់ពលរដ្ឋខ្មែរ ដែលរស់នៅតាមតំបន់ព្រំដែន និង មតិសាធារណៈជនជាទូទៅថា កិច្ចការបោះបង្គោលព្រំដែន ដែលបាននិងកំពុងប្រព្រឹត្តទៅនៅតាមព្រំដែនរវាងព្រះរាជាណាចក្រកម្ពុជា និង ប្រទេសវៀតណាម មានភាពមិនត្រឹមត្រូវ ដូចជាការខ្វះមន្ត្រីបច្ចេកទេស និង មធ្យោបាយមិនគ្រប់គ្រាន់ពីខាងភាគីខ្មែរ ជាមួយនឹងនីតិវិធីមិនច្បាស់លាស់ពីការដោះស្រាយលើដីស្រែចំការពលរដ្ឋ ដែលប៉ះពាល់ដោយការកំណត់ទីតាំងព្រំដែនទាំងនោះ ។
នៅក្នុងសំណុំរឿងបោះបង្គោលព្រំដែនកម្ពុជា និង វៀតណាមនោះ អាជ្ញាធរខេត្តស្វាយរៀងបានប្តឹងលើលោកសម រង្ស៊ី ប្រធានគណបក្សជំទាស់ ដោយសារតែលោកបានដឹកនាំកម្លាំងអ្នកភូមិចុះទៅដកបង្គោលតម្រុយ សម្រាប់ដំណើរការបោះបង្គោលព្រំដែន នៅឃុំសំរោង ស្រុកចន្ទ្រា ខេត្តស្វាយរៀង កាលពីថ្ងៃទី ២៥ តុលា ឆ្នាំ២០០៩ ។
បច្ចុប្បន្ន ពាក្យបណ្តឹងនោះ ត្រូវបានតុលាការខេត្តស្វាយរៀង កំពុងតែចាត់ការ ។ យ៉ាងហោចណាស់ មានអ្នកភូមិ ដែលខ្លះធ្លាប់បានតវ៉ាថា ការបោះបង្គោលកំណត់កម្ពុជា និង វៀតណាម បានធ្វើឲ្យបាត់បង់ដីស្រែកសិករខ្មែរ ត្រូវបានតុលាការកោះហៅ ដើម្បីចូលបំភ្លឺតុលាការ នៅថ្ងៃអង្គារនេះ និង នៅថ្ងៃពុធស្អែក ។
នៅថ្ងៃអង្គារនេះ ជំទប់ទី២ឃុំសំរោង លោក ពៅ ភាព ដែលជាសមាជិកគណបក្សសមរង្ស៊ី រួមនឹងសមាជិកក្រុមប្រឹក្សាឃុំបាវិតពីរនាក់ទៀត គឺ លោក សុខ សំអៀន និង លោក សុក កន ត្រូវចូលឆ្លើយបំភ្លឺតុលាការខេត្តស្វាយរៀង ពាក់ព័ន្ធនឹងរឿងលោកសមរង្ស៊ី ដកបង្គោលតម្រុយព្រំដែន ។ ចំណែកនៅថ្ងៃពុធស្អែក កសិករចំនួន ៥ នាក់ ផ្សេងទៀត នៅឃុំសំរោង ដែលបានអះអាងពីការបាត់បង់ដីស្រែ ដោយសារការបោះបង្គោលកំណត់ព្រំដែនកម្ពុជា និង វៀតណាម នឹងត្រូវចូលឆ្លើយបំភ្លឺតុលាការខេត្តស្វាយរៀង ជាប់ព្រំដែនប្រទេសវៀតណាម តាមដីកាកោះហៅរបស់ លោកចៅក្រមស៊ើបអង្កេត ឡុង កេសភីរម្យ ។
កាលពីថ្ងៃទី១៥ ធ្នូសប្តាហ៍មុន តាអាចារ្យវត្តអង្គរំដិញម្នាក់ និង ពលរដ្ឋនៅឃុំសំរោងម្នាក់ បានចូលបំភ្លឺ ក្នុងនាមជាសាក្សីលើសំណុំរឿងចោទប្រកាន់លោក សម រង្ស៊ី។
ចំណែកលោក សម រង្ស៊ី ដែលជាជនត្រូវចោទពីបទញុះញង់ និង បំផ្លាញទ្រព្យសម្បត្តិសាធារណៈ ត្រូវតុលាការកំណត់ឲ្យចូលបំភ្លឺ នៅថ្ងៃ ២៨ ធ្នូ ។
ក៏ប៉ុន្តែក្រុមមន្ត្រីគណបក្សសមរង្ស៊ីបានលើកឡើង ថា សព្វថ្ងៃលោក សម រង្ស៊ី កំពុងស្ថិតនៅប្រទេសបារាំង ។ លោកសមរង្ស៊ី នឹងមិនចូលបង្ហាញខ្លួនតាមដីកាកោះរបស់តុលាការខេត្តស្វាយរៀងឡើយ ។
សូមបន្ថែមថា សេចក្តីប្រកាសរបស់រដ្ឋសភា នៅថ្ងៃទី២១ ធ្នូ ក៏បានលើកឡើងថា ក្រៅតែពីការឆ្លើយបំភ្លឺក្នុងរឿងព្រំដែន ដែលជាចម្ងល់របស់អ្នកតំណាងរាស្ត្រគណបក្សសមរង្ស៊ី នៅក្នុងសម័យប្រជុំរដ្ឋសភា លើកទី៣ នីតិកាលទី៤ ដឹកនាំដោយសម្តេច ហេង សំរិន នៅថ្ងៃព្រហស្បតិ៍ ខានស្អែកនេះ ក៏នឹងធ្វើការពិភាក្សា និង អនុម័តលើសេចក្តីព្រាងច្បាប់ ស្តីពី អស្សាមិករណ៍ ។ អស្សាមិករណ៍ ជាច្បាប់ ដែលកំណត់ពីការមិនមែនជាកម្មសិទ្ធិ ពោលគឺ រដ្ឋាភិបាលអាចដកហូតនូវដីផ្ទះសម្បែងទាំងឡាយណាក៏បាន ដើម្បីបម្រើនូវផលប្រយោជន៍សាធារណៈ ៕
