ខេត្តឧត្តរមានជ័យ៖ តាមប្រភពព័ត៌មានបានឱ្យដឹងថា មានប្រជាពលរដ្ឋខ្មែរម្នាក់បានស្លាប់ ម្នាក់រងរបួស និង៩នាក់ផ្សេងទៀត ត្រូវបានទាហានសៀមចាប់ខ្លួនក្នុងហេតុការណ៍អូសឈើគ្រញូងលើខ្នងភ្នំដងរែក នៅ ព្រឹកថ្ងៃទី៥ និង៦ ធ្នូ កន្លងមក ។
ទាក់ទិនទៅនឹងបញ្ហាកាប់ និងអូសឈើគ្រញូង ទំ លាក់ចុះពីកំពូលភ្នំដងរែកតាមព្រំដែនខ្មែរ-សៀមនេះ បើគេនៅចាំមិនភ្លេចទេនោះ តាមរបាយការណ៍ពីសមត្ថកិច្ចច្រកទ្វារអន្តរជាតិអូរស្មាច់ និងច្រកអន្តរជាតិ ជាំរបស់កម្ពុជាបានឱ្យដឹងថា គិតពីដើមខែមករា រហូតដល់ដំណាច់ខែវិច្ឆិកា ២០០៩ កន្លងមកនេះ ប្រជា ពលរដ្ឋខ្មែរដែលនាំគ្នាឡើងភ្នំទៅកាប់ឈើគ្រញូងត្រូវទាហានឈុតខ្មៅសៀម បាញ់សម្លាប់៤នាក់ របួស៣នាក់ ព្រមទាំងចាប់ខ្លួនបាន៩៦នាក់រួចមកហើយ។ ដូច្នេះបើសិនជាបូកនឹងតួលេខក្នុងហេតុការណ៍ ដែលបានកើត ឡើងនៅដើមខែធ្នូនេះ គឺទាំងអ្នកស្លាប់អ្នករបួស និងអ្នកត្រូវចាប់ខ្លួនមានការកើនឡើង។
យោងតាមហេតុការណ៍ដែលបានកើតឡើង គឺបង្ហាញថា ទោះបីមានវិធានការជាហូរហែរបស់អាជ្ញាធរ ក៏ដោយក៏ប្រជាពលរដ្ឋមិនបានគោរពតាមនោះទេ ដោយនៅតែលួចឡើងភ្នំកាប់ឈើដដែល ជាពិសេស គឺស្រុកត្រពាំងប្រាសាទ ដែលតែងកើតមានបញ្ហានេះរៀងរាល់លើក។ ការបាញ់រះជាបន្តបន្ទាប់មកលើក្រុម អ្នកលួចកាប់ឈើខ្មែរនេះ ត្រូវបានភាគីសៀម និយាយថា ចូលកាប់ឈើក្នុងទឹកដីរបស់ខ្លួន ។ ទោះបីជា បែបណា មន្ត្រីស្រុកត្រពាំងប្រាសាទបាននិយាយថា យើងបានផ្សព្វផ្សាយដល់ប្រជាពលរដ្ឋមិនឱ្យឡើង ទៅលើភ្នំ ព្រោះតែខ្លាចមានគ្រោះថ្នាក់ជាយថាហេតុ ព្រោះតាមបន្ទាត់ព្រំដែនខ្មែរ-សៀម កំពុងក្លាយជា ការប្រទង់ប្រទាញគ្នាដែលមិនច្បាស់លាស់ទេ ។ ការទប់ស្កាត់ហាក់ដូចជាមិនមានប្រសិទ្ធភាពសោះ ទើប រឿងដដែលៗតែងកើតឡើងម្ដងហើយម្ដងទៀត។
តាមសេចក្ដីរាយការណ៍បានឱ្យដឹងថា មានហេតុការណ៍បានកើតឡើងបន្តបន្ទាប់គ្នា ដែលករណីទី១ បានកើត ឡើងកាលពីវេលាម៉ោង៣និង៣០នាទីរសៀល ថ្ងៃទី៥ ធ្នូ ខណៈប្រជាពលរដ្ឋនាំគ្នាឡើងទៅលើភ្នំដងរែក ចំនួន១០នាក់ ដោយមានរទេះសំ រាប់អូសឈើគ្រញូង និងម៉ាស៊ីនត្រង់សឺន័រចំនួន២គ្រឿងផង ។ ក្រុមអ្នក ឡើងភ្នំនេះ ត្រូវទាហានសៀមបាញ់បណ្ដាលឱ្យស្លាប់ម្នាក់ និងរបួសជាន់មីនដាច់ជើងទាំងសងខាងម្នាក់ នៅចំណុចទល់មុខកងកម្លាំង កងពលលេខ៨ការពារព្រំដែនខាងកើតក្បាលអូរ៥០ ឆៀងខាងជើងអូរចាក់ ច្រែង ក្នុងភូមិអូរត្រាំប៉ោង ឃុំព្រះប្រឡាយ ស្រុកត្រពាំងប្រាសាទ ។ ករណីទី២-ទាហានសៀម បានបាញ់រះមកលើប្រជាពលរដ្ឋចំនួនជិត៤០នាក់ ដែលនាំគ្នាឡើងទៅលើភ្នំដងរែកនៅចំណុចស្រែល្អ ឃុំ បាក់អន្លូង ស្រុកត្រពាំងប្រាសាទ កាលពីវេលាម៉ោង៩ព្រឹកថ្ងៃទី៦ ធ្នូ កន្លងទៅ ហើយចាប់បាន៨នាក់ និងរត់រួចចំនួន២៦នាក់មកដល់លំនៅឋានវិញ។
យោងតាមសេចក្ដីរាយការណ៍ពីប្រជាពលរដ្ឋដែលសុំមិនបញ្ចេញឈ្មោះបានឱ្យដឹងថា ទាក់ទងនឹងហេតុការណ៍ លើកទី១ ក្រុមទាហានឈុតខ្មៅ និងក្រុមមន្ត្រីព្រៃឈើសៀម ដែលដើរល្បាតបានជួបប្រទះប្រជាពលរដ្ឋ ខ្មែរក៏ផ្ទុះអាវុធប្រហែល៤០ទៅ៥០គ្រាប់ កាលពីវេលាម៉ោង៣និង៣០នាទី រសៀលថ្ងៃទី៥ ធ្នូ បណ្ដាល ឱ្យរងរបួសខ្មែរម្នាក់ ត្រូវចំភ្លៅខាងស្តាំមួយគ្រាប់ ហើយត្រូវទាហានសៀមចាប់បាន និងយកទៅ មន្ទីរពេទ្យតែបានស្លាប់នៅពាក់កណ្ដាលផ្លូវ។ សពត្រូវបានតម្កល់ទុកនៅស្រុកខាន់តាឡាក់ ខេត្តស៊ីសាកេត។
តាមប្រភពព័ត៌មានថា ក្រុមទាហានសៀមបានយករទេះ និងម៉ាស៊ីនត្រង់សឺន័រ២គ្រឿង ដុតកម្ទេចចោលផង ដែរ។ ចំណែកឈ្មោះនាង ភៀង ភេទប្រុស អាយុ៣៤ឆ្នាំ ដែលគេដឹងថា ជាទាហានក្នុងកងវរលេខ៨១ កងពលលេខ៨បានជាន់មីនដាច់ជើងទាំងសងខាង នៅចំណុចវាលថ្មដា ហើយត្រូវបាននាំយកទៅធ្វើការ សង្គ្រោះ កាលពីថ្ងៃទី៦ តុលា ។ អ្នកដែលស្លាប់ត្រូវបានឱ្យដឹងថា ឈ្មោះមាស ក្អូន ភេទប្រុស អាយុ១៩ឆ្នាំ រស់នៅភូមិស្រែល្អ ឃុំបាក់អន្លូងស្រុកត្រពាំងប្រាសាទ។
យោងតាមសេចក្ដីរាយការណ៍បន្ថែមថា ករណីទី២ បានកើតឡើងកាលពីវេលាម៉ោង៩ ព្រឹកថ្ងៃទី៦ ធ្នូ ដោយប្រជាពលរដ្ឋមួយក្រុមមានគ្នា៣០-៤០នាក់ បានឡើងទៅលើកំពូលភ្នំដងរែក ចំណុចវាលថ្មដា ស្ថិត នៅក្នុងភូមិស្រែល្អ ឃុំបាក់អន្លូង ស្រុកត្រពាំងប្រាសាទ ត្រូវបានក្រុមទាហានសៀមបាញ់ និងព័ទ្ធចាប់ បានចំនួន៨នាក់ ហើយរត់រួច២៦នាក់មកដល់លំនៅឋានវិញ។
លោកវរសេនីយ៍ត្រី តាន់ អធិការប៉ូលិសស្រុកត្រពាំងប្រាសាទបានឱ្យដឹងថា បន្ទាប់ពីមានបញ្ហា នេះកើតឡើង លោកបានដឹកនាំកម្លាំងប៉ូលិស ចុះទៅតាមបណ្ដាឃុំ ដើម្បីស៊ើបសួររកអ្នកដែលទើបតែរត់ រួចពីការដេញបាញ់ពីសំណាក់ក្រុមទាហានឈុតខ្មៅសៀម និងបានឃើញចំនួន៦នាក់ មកពីភូមិពង្រ ឃុំពង្រ ស្រុកបារាយណ៍ ខេត្តកំពង់ធំ ។ តាមការសាកសួរទៅលើឈ្មោះប៉ុន ប៉ ភេទប្រុស អាយុ១៩ឆ្នាំ រស់នៅភូមិ-ឃុំខាងលើ បានឆ្លើយថា នៅថ្ងៃទី២ ធ្នូ មានគេមកទាក់ទងឱ្យទៅស៊ីឈ្នួលអូសឈើគ្រញូង លុះដល់នៅ ថ្ងៃទី៥ ធ្នូ ពួកខ្លួនដែលមកពីស្រុកក៏នាំគ្នាឡើងភ្នំដោយមានអ្នកនាំផ្លូវផងដែរ។ លុះពេលឡើងទៅលើកំពូលភ្នំដងរែក ស្រាប់តែមានទាហានសៀមដេញបាញ់ ហើយពួកខ្លួនទាំង៦នាក់បាននាំគ្នារត់ចុះមកដល់ភូមិវិញនៅថ្ងៃទី៦ធ្នូ។
បន្ទាប់មក សមត្ថកិច្ចប៉ូលិសបាននាំមកអធិការដ្ឋានស្រុកត្រពាំងប្រាសាទ ធ្វើការអប់រំ និងព្រមានឱ្យ ធ្វើកិច្ចសន្យាផ្ដិតមេដៃឈប់ឡើងទៅកាប់ឈើ និងដោះលែង ឱ្យទៅផ្ទះវិញ ។
(អត្ថបទដកស្រង់ពីកាសែត www.kohsantepheapdaily.com.kh)
ហេតុអ្វីបានជាពួកគេបាញ់ពលរដ្ឋខ្មែរ?