លោក សម រង្ស៊ី ប្រធានគណបក្សប្រឆាំងកម្ពុជា កាលពីថ្ងៃទី ១៦ ខែធ្នូ ត្រូវបានចៅក្រមស៊ើបសួរ នៃសាលាដំបូងខេត្តស្វាយរៀង បង្គាប់អោយចូលបំភ្លឺដំណើររឿងធ្វើអោយខូចតម្រុយបង្គោលព្រំដែន កម្ពុជា និងវៀតណាម លេខ១៨៥ និងការញុះញង់អោយមានការរើសអើងជាតិសាសន៍ ។
តាមដីកានោះមេបក្សប្រឆាំងត្រូវបង្ហាញខ្លួននៅព្រឹកម៉ោង ៩ ថៃ្ងទី ២៨ ខែធ្នូ ហើយបើមិនចូលខ្លួនតាមកាលកំណត់តុលាការនឹងចេញដីកាបង្គាប់អោយ នាំខ្លួន ។ ការកោះហៅ លោក សម រង្ស៊ី ត្រូវបានធ្វើឡើងបន្ទាប់ពីចៅក្រមសាលាដំបូងខេត្តស្វាយរៀងបានកោះហៅ លោក ពៅ ភាព ដែលជាជំទប់ទី២ នៃឃុំសំរោងស្រុកចន្ទ្រា មកពីគណបក្សសម រង្ស៊ីអោយចូលបំភ្លឺក្នុងនាមជាសាក្សីក្នុងសំណុំរឿងដកបង្គោលតំរុយ ព្រំដែនកម្ពុជាវៀតណាមដែលប្រព្រឹត្តដោយលោក សម រង្ស៊ី ប្រធានគណបក្សសមរង្ស៊ី ។ លោកចៅក្រម ឡុង កេសភីរម្យ បានកោះហៅ លោក ពៅ ភាព អោយចូលបំភ្លឺនៅថ្ងៃទី ២២ ខែធ្នូ វេលាម៉ោង ២រសៀល ។ ចៅក្រមនៃតុលាការខេត្តស្វាយរៀងបានកោះហៅមនុស្សពីរនាក់មកសាកសួរ រួចហើយ កាលពីថ្ងៃទី ១៥ ធ្នូ ទាក់ទងនឹងសំណុំរឿងនេះ ។
ក្រោយពីមានការកោះហៅសាកសួរលោក ពៅ ភាព នេះ នៅឯក្រៅប្រទេស លោក សម រង្ស៊ី បានធ្វើសេចក្តីថ្លែងការណ៍មួយជាភាសាអង់គ្លេសពីប្រទេសបារាំងដោយ ដាក់សំណួរថា ហេតុអ្វីបានជាតុលាការមិនចាត់ការរូបលោក? នៅក្នុងសេចក្តីថ្លែងការណ៍ដែលបានចុះផ្សាយក្នុងគេហទំព័រគណបក្សសម រង្ស៊ី លោក សម រង្ស៊ី បានហៅតុលាការកម្ពុជា ថាជា តុលាការសត្វកង់ហ្ការូ Kangaroo( តុលាការសត្វកង់ហ្ការូ គឺជាតុលាការដែលមិនគោរពនីតិវិធី) ។ ក្នុងន័យនេះលោក សម រង្ស៊ី បានចោទសួរថា ហេតុអ្វីបានជាតុលាការ(ខេត្តស្វាយរៀង)មិនកោះហៅរូបលោកដែលជាជន ត្រូវចោទចំបង? តែបែរជាកោះហៅ លោក ពៅ ភាព ដែលជំទប់ទី២ ឃុំសំរោងទៅវិញ? លោក សម រង្ស៊ី បានសរសេរថា “ ខ្ញុំចង់អោយតុលាការសត្វរកង់ហ្ការូ ចោទប្រកាន់ខ្ញុំ ” ។
កាលពីថ្ងៃទី ២៥ ខែតុលា ប្រធានគណបក្សសមរង្ស៊ី លោក សម រង្ស៊ី បានដកតំរុយបង្គោលព្រំដែនកម្ពុជាវៀតណាមក្នុងភូមិកោះក្បានកណ្តាល ឃុំសំរោង ស្រុកចន្ទ្រា ខេត្តស្វាយរៀង ។ សកម្មភាពនេះបានក្លាយទៅជាកម្មវត្ថុនៃការដាក់ពាក្យបណ្តឹងពីសំណាក់ អាជ្ញាធរខេត្តស្វាយរៀង ។ អាជ្ញាធរខេត្តបានចោទប្រកាន់ លោក សម រង្ស៊ី និងគូកនថា បានបំផ្លាញទ្រព្យសម្បត្តិសាធារណៈ និងញុះញង់អោយមានការប្រកាន់ពូជសាសន៍ ដោយសារលោក សម រង្ស៊ី បានថ្លែងថា រដ្ឋាភិបាលកម្ពុជាគិតតែខាងលិចភ្លេចខាងកើត ។ ដើម្បីបើកផ្លូវអោយតុលាការអាចចាត់ការតាមនីតិវិធីរបស់ខ្លួន កាលពីថ្ងៃទី ១៦ វិច្ឆិកា រដ្ឋសភាក៏បានសំរេចលើកព្យួរអភ័យឯកសិទ្ធសភារបស់លោក សម រង្ស៊ី ។
សកម្មភាពរបស់លោក សម រង្ស៊ី ក៏បានក្លាយជាប្រធានបទនៃការរិះគន់របស់សម្តេចនាយករដ្ឋមន្ត្រី ហ៊ុន សែន ផងដែរ ។ កាលពីល្ងាចថ្ងៃទី ១៦ សម្តេចនាយករដ្ឋមន្ត្រី ក្នុងឱកាសផ្តល់អាហារូបករណ៍ដល់និស្សិត សម្តេចនាយករដ្ឋមន្ត្រីបានអត្ថាធិប្បាយថា លោក សម រង្ស៊ី កំពុងជួយបំរើផលប្រយោជន៍អោយរដ្ឋាភិបាលថៃរបស់លោក អាប់ភីស៊ីត ។ សម្តេចនាយករដ្ឋមន្ត្រីថ្លែងថា “ លោក សម រង្ស៊ី មិនដែលថ្កោលទោសប្រទេសថៃទេ ចាប់តាំងពីមានជម្លោះព្រំដែនប្រាសាទព្រះវិហារ ” ។ សម្តេចក៏បានមានប្រសាស៍អោយដឹងផងដែរថា វានឹងលែងមានលទ្ធភាពនៃការសំរុះសំរួលគ្នាដូចគ្រាមុនៗទៀតហើយសំរាប់ លោក សម រង្ស៊ី ។ សំរាប់សម្តេចយ៉ាងហោចណាស់ក៏លោក សម រង្ស៊ី ត្រូវជាប់ ២ភាគ៣ នៃទោសរបស់ខ្លួនដែលតុលាការខេត្តស្វាយរៀងកំពុងបន្តនីតិវិធីនេះដែរ ។
ឆ្លើយតបនឹងសម្តេចនាយករដ្ឋមន្ត្រីនោះ លោក យឹម សុវណ្ណ អ្នកនាំពាក្យគណបក្សសមរង្ស៊ីបានថ្លែងថា “ អ្នកតំណាងរាស្ត្រគណបក្សសម រង្ស៊ីរបស់លោកធ្វើការងារដើម្បីផលប្រយោជន៍ និងបូរណភាពទឹកដីរបស់ប្រជាពលរដ្ឋខ្មែរ ទាំងខាងកើត និងខាងលិច ” ។ ទាក់ទងនឹងជម្លោះបន្ទាត់ព្រំដែនជាមួយប្រទេសថៃសព្វថ្ងៃ បើតាមលោក យឹម សុវណ្ណ គណបក្សរបស់លោកតែងតែអំពាវនាវអោយរដ្ឋាភិបាលនាំយកបញ្ហានេះទៅ ដោះស្រាយនៅថ្នាក់អន្តរជាតិ ។
នៅពេលនេះ លោក សម រង្ស៊ី កំពុងស្នាក់នៅប្រទេសបារាំង ហើយគេមិនដឹងថាពេលណាទើបលោក សម រង្ស៊ី ត្រលប់មកកម្ពុជាវិញនោះដែរ ។
នៅពេលដែល សម រង្ស៊ី អវត្តមាននៅក្នុងប្រទេស តំណាងរាស្ត្រគណបក្សសមរង្ស៊ីបានចុះទៅកន្លែងកើតហេតុក្នុងស្រុក ចន្ទ្រាម្តងទៀត កាលពីថ្ងៃទី ១៤ ដើមសប្តាហ៍នេះ ។ វត្តមានរបស់តំណាងរាស្ត្រ និងសមាជិកគណបក្សសមរង្ស៊ីជាថ្មីបានធ្វើអោយមានការប្រទូស្តរាយ គ្នាមួយឈុតជាមួយអាជ្ញាធរស្រុកចន្ទ្រានោះ ។ ប៉ូលិសខេត្តស្វាយរៀងបានចោទប្រកាន់ថា សមាជិកគណបក្សសមរង្ស៊ីបានបង្កអោយប៉ូលិសរបួសជាច្រើននាក់ ។ ប៉ុន្តែក្រុមតំណាងរាស្ត្រគណបក្សសមរង្ស៊ីបានច្រានចោលការចោទប្រកាន់ នេះ ៕
-
ភ្ញៀវកំពុងទស្សនា
